06:16 م
السبت 08 يوليه 2023
كتبت- بهيرة فودة:
شاركت الفنانة ياسمين غيث جمهورها بصور لها، عبر حسابها الرسمي بموقع “إنستجرام”.
وكشفت ياسمين أنها تخضع لفحوصات طبية كل شهر تقريبا، وعلقت: “الحياة علمتني إنها صعبة، أوقات مستحيلة، متعبة، مؤلمة، ومليانة عذاب، بس كمان علمتني إني لما بركز على الأمل، على الإيجابية، على الحلو اللي فيها، اللي مش بندوقه غير بعد كل الوحش اللي فوق، بحاول أقف على رجلي تاني، مش سهلة، بس بحاول لسه عندي ألم بس مكملة، لسه بعيط وبزعل من غير أسباب حقيقية في أوقات كتير من كتر صعوبة اللي عديت وبعدي بيه”.
وأضافت: “عايشة بفحوصات كل شهر و٢ و٣ و٦ يعني طول الوقت تقريبا، بس بحاول أستمتع بالحياة بينهم، عايشة بصعوبة بس ألف حمد وشكر لسه عايشة”.
كانت نشرت ياسمين غيث، مارس الماضي، صوراً من المستشفى بعد عملية جراحية استلزمت استئصال ورم، وذلك عبر حسابها على “انستجرام”.
وظهرت ياسمين بالصور ويبدو عليها الشحوب، إلى جانب صورة أرشيفية لها بغرفة العمليات وبعدها بالعناية المركزة.
وعلقت قائلة: “عارفة إنكم قلقانين عليا ومش عايزة أتأخر عليكم أكتر من كدة رغم تعبي لسه، مبدئياً ده شكلي معظم الـ ٥ شهور اللي فاتوا، من شهر ١١ حتى الآن، الحمد عملت العملية يوم ٦/٢ (عملية open chest لإزالة ورم حجمه ٨ سم+)، الحمد لله ألف حمد وشكر طلع حميد وطلع إنه كتلة من الغدة الدرقية وده هيحتاج إني أعمل فحوصات و check up على الغدة كل ٣ شهور، ده طبعا غير ال general check upاللي بعمله كل ٦ شهور.. الحمد لله على كل حاجة.
واستكملت: “عاملة إيه؟ تعبانة.. حاسة بإيه؟ ألم لا يحتمل في عضمي، في ضلوعي، في أعصابي بس كدة؟، لأ.. العملية مكانها صعب والفتح في عضم الصدر ألمه مش طبيعي، بس أي إنسان عادي بيحس بالألم ده بطريقة معينة لكن أنا إيه اللي بيحصل معايا؟ أنا من ٧ سنين عملت عملية ال breast cancer اللي شالوا فيها من صدري اليمين جزء من العضلة، ومعظم الغدد (lymph nodes) اللي تحت الذراع وده أثر من وقتها على ذراعي اليمين وفضل كذا شهر بيوجعني وبعد كدة كمّل معايا التنميل والوجع بس محتمل”.
واختتمت ياسمين غيث حديثها قائلة: “أنا مش بحب أحط صور كدة بس حبيت أعرفكم المرة دي أنا في إيه وبعدي بإيه وشكلي عامل إزاي حاليا والجرح شكله إيه علشان ماتتخضوش لما تشوفوني لأن أنا من كتر وجع الجرح كمان و الirritation اللي فيه مش بستحمل هدوم عليه فحتى في عز البرد بكون مش حاطة أي هدوم عليه علشان مش بستحمل، فمتخافوش من شكله، ادعولي أرجع زي الأول، أنا بقالي ٥ شهور عملت فيهم ٤ عمليات بين المستشفيات والعناية المركزة والدكاترة والفحوصات وأوجاع لا تحتمل والله، ادعولي على الأقل أرجع أعيش من غير ألم تاني، أنا الحمد لله بتحسن بالعلاج الطبيعي بس ببطء شوية”.
