هاجر أحمد تطالب مستاءة من استخدام حديثي الولادة بالتصوير: الذكاء الاصطناعي ميقدرش يساعدنا؟
11:40 م
الخميس 22 يونيو 2023
كتب- مصراوي:
عبرت الفنانة هاجر أحمد عن استيائها من استخدام الأطفال حديثي الولادة في التصوير، ووجهت سؤالا بشأن إمكانية الاستعانة بتقنية الذكاء الاصطناعي لإيجاد بديل.
وكتبت عبر صفحتها الرسمية عبر موقع التواصل الإجتماعي “انستجرام” من خلال خاصية القصص القصيرة: “هل الذكاء الاصطناعي أخر تطورات التكنولوجيا في العالم ميقدرش يساعدنا إن احنا نوقف استخدام الأطفال حديثي الولادة، اللي أعمارهم لا تتعدى أسبوع في التصوير في السينما أو الدراما أو إعلان؟.. منقدرش نوقف استخدام الأطفال الرضع اللي هما لا يعوا أي شئ حولهم حبايبي الملايكة، اللي كل ذنبهم إن عندهم أم أو أب لا يستحقوا الكلمة دي ومفيش عندهم ذرة رحمة ويجروا يعملوا كده عشان أكبر مبلغ ممكن ياخدوه في اليوم للطفل اللي عمره ما يكملش أسبوع هو 50 دولار وأعتقد إن المبلغ كمان أقل من كده”.
وأضافت: “معقول طفل عمره ما يتعداش أسبوع المفروض يكون لسه في المستشفى أو تحت إشراف طبي، وأمه اللي جابته الدنيا اللي هي السبب في وجوده تاخده مواقع تصوير كلها تراب ودخان سجاير وصوت عالي وحر أو برد بدون أي رحمة، وممكن المشهد يفضل ساعة أو ساعتين بدون رضاعة أو تغيير، معقول حد يقبل بكده؟ .. حاجة مؤلمة جدا ومتعبة نفسيا جدا.. برجو من ربنا بجد إن الذكاء الاصطناعي ده يرحم الأطفال دول مادام أهلهم مش راحمينهم”.
واختتمت حديثها قائلة: “ربنا يرحمهم ويوظف الذكاء الاصطناعي ده ويحل محل الأطفال الغلابة دول في التصوير ونوقف المهزلة دي في العالم كله .. الحقيقة لو ده حصل هيكون أعظم إختراع وأهم إختراع إنساني في العالم كله”.
وكانت قد كشفت “هاجر” خلال الأيام القليلة الماضية عن استمتاعها بعطلتها الصيفية برفقة زوجها في المغرب وحرصت على نشر صور وفيديوهات خلال تواجدها بعدد من المعالم الأثرية هناك.
