08:31 م
الخميس 17 أغسطس 2023
كتب- مروان الطيب:
حلت الفنانة عايدة رياض ضيفة على برنامج “الستات” تقديم الإعلامية سهير جودة والإعلامية مفيدة شيحة ويعرض على قناة “النهار”.
وتطرقت “عايدة” للعديد من التفاصيل الخاصة بحياتها المهنية والشخصية إلى جانب علاقتها بمعظم نجوم الوسط الفني وأبرزهم “الزعيم” عادل إمام والذي تعاونت معه بالعديد من الأعمال الناجحة طوال مسيرتها.
كما تحدثت عن ارتباطها بلاعب كرة قدم شهير كان نجم نادي الزمالك، ورفضت ذكر اسمه، لافتة أن علاقة حب ربطتهما، ومؤكدة أنها تزوجت من الفنان الراحل محرم فؤاد كيداً بهذا النجم، بسبب رفض أسرته ارتباطه بها.
وعلقت عايدة رياض قائلة: “نجم الزمالك كان حبي الثاني بعد زميلي بفرقة رضا شوقي نعيم”، لافتة إلى أن القصة لم تكتمل، وتزوجت بعد ذلك من الفنان محرم فؤاد، قائلة “بعد 6 شهور من جوازنا حبيته جداً وهو ماكنش إنسان عادي برضه ده كان محرم فؤاد وليه جماهيرية ومش أي حد يعني والموضوع مكانش غرام وانتقام يعني بيني وبينه مش عند يعني، وأنا مكانش في بالي في الأول محرم فؤاد وفي مرة جه المسرح وقالي على طول أنا عاوز أتجوزك”.
واستكملت “هو جاله مسرحية وكنت قاعدة بقراها وحسيت إن المسرحية كوميدي شوية وقلت له يا محرم على فكرة أنت لازم تجيب معاك كوميديان، قالي إيه فهمك انتي بتاعة الفرقة القومية، قلت لا أنا بفهم في الفن طبعاً وقالي لا متبفهميش وقلت له لأ بفهم وكانت خناقة كبيرة جداً”.
وأضافت: “مد إيده عليا مرة واحدة كنت في لندن وكملت معاه وكنت لسه مخطوبة على فكرة وكنت رايحة اشتري حاجات من لندن، ضربني عشان كان غيران عشان قلت هرجع لحبيبي القديم واتضربت ضرب مبرح ولولا أن كان فيه ناس موجودة كان قتلني”.
وعن طلاقها منه علقت: “بعد 5 سنين كان فيه فترة انفصال لأن كنت عايزة ارجع شوية الشغل وهو ماكنش قايلي اني مش هشتغل، ده كان قايلي اننا هنعمل حاجات استعراضية وقعدت ورضيت وبقيت من واحدة في فرقة بتلف العالم لحد قاعد في البيت، وبعدين مخلفتش وكانت حاجة بتاعة ربنا وتعبت نفسياً وبقى عندي ملل وبرضه فيه شوية حاجات مع العشرة في الأول كنت بهابه شوية لكن بعد 5 سنين ابتديت ارد بقى”.
جدير بالذكر أن عايدة رياض شاركت في الفترة الأخيرة بالجزء الثالث من مسلسل “ليه لأ”، بطولة النجمة نيللي كريم، وعُرض على منصة شاهد vip.
