“حسبي الله ونعم الوكيل”.. رضا بوبو يكشف مفاجأة بخصوص مستحقاته لدى فيوتشر

01:36 م


الثلاثاء 22 أغسطس 2023

كتب: هند عواد

تحدث محمد رضا “بوبو”، لاعب بيراميدز الحالي، عن أزمة تخص بقية مستحقاته لناديه السابق فيوتشر.

كتب بوبو عبر صفحته الرسمية على “فيسبوك”: “خلاص مبقيتش قادر أصبر أكتر من كده بصراحه، حتى لو العواقب كتير ولو هيحصل إيه، المهم أهدي النار اللي جوايا شوية عشان أكون حتى ارتحت من جوايا، وكده كده ربنا موجود وهيجبلي حقي”.

أضاف: “أنا كنت خلصت وجالي اتصال تعالى ضروري النادي عشان تمضي الاستغناء بتاعك عشان خلاص إنت مشيت، قولت حاضر وركبت عربيتى وطلعت على النادي الساعه 11 بليل الناس قابلتنى في النادي وقالولي عامل إيه يا رضا، عايزينك تمضي ورقتين ورقة مخالصة والاستغناء”.

واصل رضا: “قولتلهم الاستغناء حاضر همضي مفيش مشكله، أي اللي يخليني أمضي مخالصة وأنا ليا 4 مليون و200 ألف جنيه، واحد لا داعي لذكر اسمه لأنه ميعرفش ربنا، قعد يكلمني ولازم تمضي، أقوله ازاي ياكابتن أمضي مخالصة وأنا ليا فلوس، قولت مش همضي ومشيت ومضيت على الاستغناء”.

أكمل بوبو: “جالي اتصال إمضي وإنت فلوسك عندي، ومتقلقش إمضي إنت وزملائك اللي ماشيين، هنيجي ونسلم عليكم وتاخدوا الشيك بالدولار زي باقي الفرقة ونشكركم أكيد يعني، اتفقت مع الاتنين اللي كانوا معايا عشان كنا متفقين إننا هنعمل كل حاجه بالإتفاق مع بعض فقالوا هنضمي كلنا ونروح التلات ناخد الفلوس، مضينا علي الورقه ومكناش مدين أي خوانة، يوم التلات لقينا اللعيبه كلها صحبنا اللي في الفرقة طلعلهم فلوس، وكل واحد شيك ماعدا إحنا التلاته والتلاته المعاريين اللي مشيوا من النادي”.

تابع: “اتصلت بالشخص ده قولتلوا الشيك بتاعنا إمتى؟، قالي بليل في ناس الصبح وفي ناس بليل وإنت بليل قولت ماشي، بليل كلمته قالي الصبح فضلت على الحال ده كل يوم، يوم يقولنا التلات الجاي يجي التلات يقول الأسبوع الجاي، ييجي الأسبوع الجاي يتقال بكره، كمان يومين علي الحال ده، في حد مشكور طبعًا بدون ذكر اسمه، قالي أنا بحبك وإنت إخويا الصغير، لو إنت مفكر إنك طلعلك فلوس يبقى بتحلم، مصدقتش وقولت لا أكيد الفلوس هتطلع الناس كلموني وقالولنا الفلوس عندنا وأنا مصدقهم، بس من الواضح إن مفيش فلوس جايه ولا أي حاجه علي العموم حسبي الله ونعم الوكيل في كل واحد أكل حقي وتعبي اللي شقيت فيه سنتين، تعبت وسفر هنا ولعبنا أفريقيا وخدنا بطولة وطلعنا مركز رابع سنتين، يعني الحمدالله مقصرتش في حاجة، بس فكرة إن حد ياكل حقك في دي صعبة عليا أوي وأنا زعلان لإن مشوفتش التقدير”.

اختتم: “أنا تم بيعي أنا وصحابي وحلينا أزمه للنادي برقم كبير، يعني أنا ممشيتش ببلاش ولا مكنتش بلعب ولا مكنتش مساهم في ده كله، عشان تاكل حقي بالطريقه دي أنا عارف الكلام ده هيضايق ناس، بس دي الحقيقة إن أنا ليا حق وعلى حق وأنا عمري ما كنت بخاف من أي حاجة، بس ازاي بتعرف تنام وتحط دماغك على المخدة وإنت أكل حق وشقى واحد، طلع عينه عشان يجمع رقم زي ده وإنت عايز تاكله عليه بكل سهوله، كده أنا مكلمتش حد من الصحفيين صحابي واللي أعرفهم، أنا حقي عند ربنا وربنا هيجبهولي أضعاف وأنا متاكد لإني مقصرتش في حاجة وربنا يعلم كده أنا من جوايا ارتحت”.