09:17 م
الأربعاء 30 أغسطس 2023
كتبت- شهد القاضي:
علقت الإعلامية بسمة وهبة على قصة طلاق الفنان أحمد سعد من زوجته مصممة الأزياء علياء بسيوني، ووجهت نصيحة له.
وقالت بسمة، ببرنامج 90 دقيقة، بخصوص منشور “علياء” التي أعلنت فيه انفصالها عن زوجها أحمد سعد: “هو منشور قاسي جدا، وواضح جدا إن هي محروقة وموجوعة جدا، الست متعملش كدة إلا لما حد يولع في حتة من قلبها أو جسمها.. المنشور اتشال ودي بشرة خير لأن إحنا نتمنى إن الزوجين يبقوا على وفاق، لأن خراب البيت مش سهل وعشان عندهم بنتين”.
وتابعت موجهة نصيحة لأحمد سعد: “أنا عايزة أنصحك يا أحمد نصيحة اعتبرها نصيحة من إعلامية أخت، الشهرة والنجومية والفلوس لازم يغيروا البني آدم وأوقات ربنا بيديهم للبني آدم اختبار أو مكافأة بس مش ليه لأ.. للست اللي معاه ولبناته”.
واستكملت: “أنت طول عمرك صوتك حلو ومن أجمل الأصوات، مقولناش حاجة، بس مكنتش بنجومية النهاردة ولا بالشهرة دي رغم إن طول عمرك صوتك حلو، بس برضه مكنش عندك كم المعجبين والمعجبات ده”.
وأردفت: “الكرسي والشهرة والنجومية بتخوف، نصيحتي لكل راجل مش أحمد بس، عنده واحدة ست وقفت جنبه، إوعى لما تعلى تديها كتف، فيه مطربين كتير طلعوا أوي في السما وبعدين
نزلوا الأرض عشان افتروا على زوجاتهم وعلى اللي ربنا سخره لهم عشان يكون سبب في نجاحهم”.
وأضافت: “إوعى تنكر إن نجوميتك زادت واختلفت بفضل الله بسبب زوجتك علياء، اللي نظمت لك حياتك، وأنت قولت معايا الكلام ده في البرنامج، سواء ماديا أو شخصيا، وشياكتك وأناقتك، وستايل لبسك اللي بقى زوقه أعلى من زمان”.
وتابعت: “هي بنت أصيلة وواقفة جنبك ووشها حلو عليك، وكل جمهور أحمد سعد عارف ده.. دلوقتي بقى الكلام كله على نجاحاتك، زمان الكلام كله كان على مشاكلك، ولا تنسوا الفضل بينكم، وإنت إبن أصول وشهم وأصيل والمفروض متنساش”.
وكشفت علياء بسيوني زوجة الفنان أحمد سعد طلاقها منه رسميًا عبر خاصية القصص القصيرة بحسابها على موقع “انستجرام” أمس الثلاثاء.
وروت “علياء” تفاصيل طلاقها من أحمد سعد وعن إهماله لها خلال الفترة الماضية وانشغاله بإحياء العديد من الحفلات الغنائية سواء داخل مصر أو خارجها وأوضحت كونه أحد أسباب الطلاق والذي جاء بشكل مفاجئ على حد قولها.
وأكدت أن سبب الطلاق هي رغبته على الرغم من تحملها العديد من الضغوطات وغيابه عن المنزل بسبب إحيائه العديد من الحفلات الغنائية مؤخرًا وعدم تواجده بشكل دائم – بحسب قولها.
وعلقت “علياء” قائلة: “الحمد لله على كل شئ، تم الطلاق بيني وبين أحمد من شوية بناء على رغبته، وحابة أقوله شكرًا على قرارك اللحظي الغير موفق في خراب بيتنا وتدمير أسرتنا الجميلة اللي أنا حقيقي تعبت فيها لوحدي تمامًا وحاولت وعديت بمواقف مفيش حد في مكاني يقبلها عشان الأسرة دي وعشان المشوار اللي أنا ابتديته ومكنتش حابة انه ينتهي”.
واستكملت: “شكرًا على توقيتك الجميل وأنا قاعدة ببنتي 3 أيام وأنت مش عارف حاجة عشان مشغول الساحل وخروجاته وبعدها شغلك، أكبر شكر على المقلب اللي أنا اخدته في العلاقة دي واللي كنت فاهمة أن ليها قيمة وبضحي وبتنازل عشانها وأنت طلعتها ولا تسوي”.
وأنهت تعليقها قائلة: “ربنا معايا أنا وبناتي في اللي جاي وينتقم منك ويديك على قد كل حاجة حصلت”.
