أنيس بوجواري لـ “مصراوي”: “5 محي الدين أبو العز من الأفلام اللي هتعيش ونعتمد على كوميديا الموقف”
12:42 م
الثلاثاء 03 أكتوبر 2023
كتب- مروان الطيب:
ينتظر صناع فيلم “5 محي الدين أبو العز” بطولة الفنان أحمد فتحي وعدد من نجوم الفن طرح الفيلم تجاريًا وذلك بعد طرح الإعلان الدعائي الرسمي منذ أيام والمقرر عرضه خلال الفترة المقبلة.
وتواصل “مصراوي” مع السيناريست أنيس بوجواري وتحدث عن الأعمال الكوميدية بشكل عام وعن الجديد الذي يقدمه بفيلم “5 محي الدين أبو العز” وعن تعاونه مع نجم الكوميديا أحمد فتحي لأول مرة.
وعن مشروع فيلم “5 محي الدين أبو العز” قال: “هي تجربة جماعية في الكتابة معايا محمد يونس، ومحمد عبد الخالق وتجربة مختلفة عن اللي بيتقدم دلوقتي في الكوميديا على الساحة وحاولنا نعتمد في الكتابة على فكرة كوميديا الموقف وبعدنا كل البعد عن كوميديا الافيه والموضوع نفسه كان فيه مساحة لخلق كوميديا الموقف”.
واستكمل: “ومكانش محتاج اننا نستظرف لأن الموضوع نفسه لايت دمه خفيف وفكرة الرحلة اللي أنا بحبها كمشاهد ومؤلف فكرة أن البطل بيخوض رحلة بيروح أماكن مختلفة ومش معتمد على مكان واحد أو شخصيات محددة، لأ هو بيقابل شخصيات كتير خلال رحلته”.
أما عن تعاونه مع الفنان أحمد فتحي، قال : “وساعدنا في ده أحمد فتحي لأن هو كان حابب يقدم حاجة جديدة وكان دماغه أنا كوميديان ايوة بس مبقاش داخل أضحك بس لأ أنا داخل أمثل ويبقى الموضوع لايت وخفيف، وهو كان حابب يعمل ده وأنا مكنتش أعرفه قبل الفيلم لكن كان عنده فكرة أنه عاوز يعمل حاجة مختلفة، وعنده تجارب زي حواري بوخارست وحالة عشق مكانش بيلعب كوميديا وكان بيلعب أدوار تقيلة”.
وعن توقعاته للفيلم عقب عرضه تجاريًا: “اتمنى الفيلم يتشاف كويس ورأيي الشخصي الأسرة هتحب الفيلم وحتى بعد ما يتعرض على المنصات والتليفزيونات الناس هتحبه وأعتقد من الحاجات اللي هتعيش وكل ما ييجي على التليفزيون الناس هتحب تشوفه مش هتبقى متضايقة”.
وعن متابعته للأعمال الكوميدية: “أنا بتابع أفلام عربي كتير جدًا أفلام لبناني وسوري ومغربي والكوميديا مؤخرًا يقال اإها بعافية شوية، ومؤخرًا الفيلم اللي شوفته وعجبني كان العميل صفر والموضوع متقدم بشكل ظريف”.
تدور أحداث فيلم “5 محي الدين أبو العز” في إطار من الإثارة والكوميديا، حول سعي شاب للارتباط قبل سفره للخارج، لكنه يفاجأ بصدور حكم غيابى ضده بالإعدام في جريمة لا يعرف عنها شيء، فيقرر الهرب من المطار ويمر بالعديد من العقبات والمواقف الكوميدية في رحلة إثبات براءته.
ويشارك ببطولة الفيلم نخبة من نجوم السينما المصرية وهم مصطفى أبو سريع، هاجر الشرنوبي، محمد جمعة، نور قدري، شريف أبو هميلة، لبنى ونس، محمد عبد العظيم، إلى جانب مشاركة عدد من النجوم كضيوف شرف منهم الفنان هشام ماجد وحسن أبو الروس، الفيلم تأليف محمد عبد الخالق، وإخراج شادي علي.
