06:30 م
الإثنين 14 أغسطس 2023
كتبت- شهد القاضي:
تحدث الفنان مصطفى قمر عن الفنان حمزة نمرة وأشاد به، وأنه تواصل معه ليهنئه على ألبومه الجديد.
وقال من خلال حواره مع الإعلامية سهير جودة عبر صفحتها بموقع التواصل الاجتماعي “فيسبوك”: أنا كلمت حمزة أبارك له على الألبوم الجميل وشوية الأغاني اللي نزلها في الآخر، حمزة ده فنان موهوب، وبيختار كلام حلو، وألحانه جميلة، صوته حلو، تجربته حلوة قوي”.
وأضاف: “كلمته وهو اتبسط إني كلمته، وقولت له إنت جميل، وقولت له ما يالا نقعد، فرحب، وأنا حاسس إن احنا بنقدم حاجة شبه بعض شوية”.
واستكمل عن حبه للفنانة اللبنانية فيروز، وعلى حد تعبيره أنها رقم 1 بالنسبة له، قائلا: “بحب أسمع فيروز دي رقم 1 عندي، وفي الجديد بقى لو عايز أتسلطن بحب أسمع صابر الرباعي، كاظم الساهر ليه شخصية وراجل راقي جدا ومهذب وبيتعامل مع الناس بإحترام شديد وصابر صاحبي جدا وهو عارف كده”.
وأردف عن الفنان رامي صبري مشيدا به وبأغانيه في أخر فترة: “رامي صبري حبيبي، وهو عامل مجموعة أغاني أخر فترة بشكل مميز كده، وبقى فيه نضوج فني في الكلمة واللحن، وهو أصلا أستاذ وخريج تربية موسيقية وكده، هو فنان وأنا بحبه وصوته جميل مش هنتكلم عليه، إنما اختياراته في الفترة الأخيرة حلوة قوي ولايقة عليه ومختلفة، وحفر لنفسه حتة، وده كان صعب جدا بس عمله”.
وأضاف: “عمري ما حسيت إني عجوز، بس ممكن أحس كده لما ألاقي إبني بيتكلم بطريقة كده.. فابصله وأحس إن في جيل أو جيلين عدوا، أنا دايما بحب أعيش السن اللي أنا وقفت عنده اللي هو سن الجامعة، أنا واقف عند الحتة اللذيذة دي اللي هو أهزر مع الشباب، أشوط كورة مع طفلة، بحب الحياة ومبحبش اللي يديني طاقة سلبية، أي حد بحس إنه هيديني طاقة سلبية، بلحقه وأقول له لأ لأ متعملش كده”.
وينتظر قمر، عرض فيلم “أولاد حريم كريم”، 30 أغسطس الجاري بدور العرض السينمائي، ويشاركه البطولة بشرى، داليا البحيري، علا غانم، بسمة، خالد سرحان، عمرو عبدالجليل، تيام مصطفى قمر، رنا رئيس، وهنا داود وعدد من الوجوه الجديدة، وتأليف زينب عزيز وإخراج علي إدريس، ومن إنتاج شركة انتلجنت (iproductions) وتوزيع خارجي روتانا.
