05:59 م
الإثنين 17 يوليه 2023
كتب- مصراوي:
شاركت والدة الفنانة ميرنا هشام متابعيها منشورا عبر صفحتها بموقع التواصل الاجتماعي “فيسبوك”.
وكتبت: “والله يا جماعة ميرنا كويسة والحمد لله ولا يمكن تفكر مجرد التفكير في الانتحار لأنها قريبة قوي من ربنا وقلبها أبيض، ولكن كل الناس الفترة الأخيرة بتمر بظروف والبيوت أسرار، والموضوع أصلا ميستاهلش كل ده واللي بيشهر وبينقل كلام محصلش منه لله، ربنا أقوى من الكل وحسبي الله ونعم الوكيل في كل ظالم”.
وطمأنت المطربة الشابة ميرنا هشام جمهورها على حالتها الصحية، في أول ظهور لها، بعد تداول أنباء تشير إلى محاولتها الانتحار، وهو ما نفته ميرنا مؤكدة أنها تمر بأزمة نفسية، لكن لم تفكر يوما في الإقدام على هذا الأمر.
وظهرت ميرنا في الفيديو الذي نشرته عبر “فيسبوك”، بصورة متعبة، قائلة “مساء الخير عليكم كلكم عايزة أطمنكم عليا، وأقول إني كويسة، محاولتش أنتحر، أي حد عارفني عمره ما يتخيل إني ممكن أعمل حاجة زي كده، عمري ما أتخيل أعمل حاجة زي كده”.
وتابعت “كل الحكاية إني تعبانة شوية بس مش لدرجة إني أنتحر، بقيت أحسن، ومختفية بقالي فترة لإني تعبانة نفسيا، وأثر عليا جسديا زي أي حد ممكن يحصله حاجة زي كده. ادعولي”.
وأضافت ميرنا “ادعولي ابقى كويسة وأنا هبقى كويسة، أي حد ممكن يمر بفترة زي كده في حياته بس هتعدي، هبقى كويسة أنا متعودة على كده معرفش الموضوع كبر كده إزاي. ادعولي وآسفة لكل حد كلمني لاإني قافلة موبايلي، مش قادرة أرد على حد وأوعدكم هبقى كويسة”، وعلقت على الفيديو “حسبي الله ونعم الوكيل”.
وأثار عدد من رواد مواقع التواصل الاجتماعي الجدل حول الفنانة ميرنا هشام نجمة أراب أيدول، وحملت التعليقات تساؤلات حول حقيقة إقدامها على محاولة الانتحار.
وكتب متابعوها عبر صفحتها بموقع التواصل الاجتماعي “فيسبوك” منشورات للاطمئنان عن صحتها وتمنوا أن تكون الأنباء المتداولة مجرد شائعات.
وجاءت التعليقات كالتالي: “ميرنا مختفية يا جماعة إدعولها ترجع لأهلها”، “حد عنده أي معلومات يا جماعة هي انتحرت ليه وهي عايشة ولا بعد الشر عنها والله زعلت قوي ربنا يلطف بيها دي بنوتة جميلة خالص”، “هو فيه إيه بجد؟ الموضوع بقى أوفر ازاي نفسك تهون عليكي كده؟”، “الخبر نزل عليا زي الصاعقة ليه كده يا ميرنا فين الأمل والتفاؤل إيه اللي وصلك لكده؟ مفيش حاجة تستاهل صدقيني”، “حبيبتي يا ميرنا سلامتك ألف سلامة ربنا يتم شفاكي على خير اوعي تيأسي من رحمة الله”.
كان أول ظهور للفنانة الشابة ميرنا هشام ببرنامج اكتشاف المواهب أراب أيدول عام 2013، وتعاونت الفنانة الشابة ميرنا هشام مؤخرا مع الفنان هيثم شاكر، وقدما دويتو حمل عنوان “شفت”.
